LA TIBIA

DAL BARBA POL

DALLA LIVRADGA

dond s'intend' al numer del putt e di ragazzun

ch'ien sta aidar a battr' al furment in s'l'ara

e far al paiar, e tutt quel ch' s'usa d'far

da i cuntadin, quand i battn al furment

ditta in t'al so linguaz.

BARBA POL CHIAMA LA SO FAMEIA A LAVURAR.

Barba Pol

Lieva su, Tunin,

E chiama Iachmin,

Ptruoni e Battston,

Minghin e Francescon,

Zannin e Galiez,

E tutt quij raghiez;

Su, ch l'è livà al strelot.

Tunin

Livà su, ragazzun,

E n'fad più i pultrun,

Su ben, ch l'è l'alba chiara,

Ch'al bsogna mettr in ara

N'stad più a sdurmiazar.

Iachmin

Eh, Tunin, lassm star,

Ch'a iho una son, cha crod.

Tunin

A chi dighia mi, t'n'od?

Sta su, ch puost crepar,

Stal mo lì a scherzar?

Iachmin

L'è segnal, cha iho padì,

E per quest a tiegn ussì

Es me dol un po' la testa.

Tunin

Oh stè la bella festa,

Oh guarda ch' purcaz

Ch' caga d'asnaz

Mo s'at viegna lì, chi sì

Ch'at fo saltar su mi,

Testa de ghiandarot,

Guarda ch zuvnot,

Da far del facend,

Chi sì ch'at dstend,

St' mang da furcà

Pr ados, tien pur suppià.

A chi dighia, va' ben dria

Ch diavl hat de dria,

Sintì un po' che gaiof,

Ch tira cert slof

Da far plar' i can,

Ca' a star in tal paltan,

E n' qui fra la zent;

Ch'sì ch'at rsent,

N'finis st'cuntrat.

Oh, lieva su in tun trat,

E n'fat ch'alza la vos.

Iachmin

Oh, ti è pur fastidios,

Po' far cha n'dig al mond

Se ben an t'arspond,

A t'od ben sbraiar,

Che t'puost affugar

Una botta, vuoial Dia,

Tuotm mo' un poc d'dria,

E n'm'star più a insturnir.

Tunin

Iachmin, n'm'far vgnir

In biestia un poc mo mi.

Iachmin

Mo a son più biesta d'ti,

S'l'ha andar da biesta a biesta,

N'm'dar più muliestia,

E n'm'star più agrzar,

Ch'am chminzarò a livar

Dam un poc al mia saccon.

Barba Pol

Osù, tus, und'è Piron?

Piron

A son qui, cosa vuliv?

Barba Pol

Al bsogna un po' t'arriv

A chiamar sti fiua,

Chi z'han d'aidar anchua

A battr, osù, va' via,

A chi dighia, mov'i pia.

Tunin

E mandai Galiez.

Che qustù è un balurdez,

Che n'sa far un'ambassà.

Barba Pol

Vai ti donca de tirà,

Galiez, e n'durmir.

Galiza

A vo via, mo c'ha a vgnir?

Barba Pol

L'ha vgnir Zech e Sandron,

Tugnaz e Salvestron,

Battstella dal fussà,

E Minghet so cugnà,

Luchin e Mingarel,

Santin e Mattarel,

Bernard e Tmasin,

Flippet e Burtlin,

Nichlò dall'Ulmadel,

Pirin e Stvanel,

Tugnon e Lurinzin,

Bastian e Gasparin,

Biaset e Francescon,

Bdet de Barba Ton,

Simon e Salvador,

Dunin e tut qulor,

Po' va', chiama l' put,

E dì ch' l' viegnin tut.

D' primis chiama la Rossa,

La Zanina della fossa,

L'Anzlina de Masin,

La Flippa de Marchin

L'Andrijna dal srai,

La Masina de Barbai

La Nichlosa dal buschet,

La Nanina dal tett,

La Pluonia de Barbon,

La Muretta de Piston,

La Minghina dal canal,

La Minozza de Pasqual,

La Bernarda de Galvan,

La Biasina de Mignan,

La Sandrina dal pradel,

La Tadia dal mattarel,

La Dratia de Barba Ton,

E la Iacma del canton,

La Nanna d'la Custanza:

L'è ver ch l'ha la panza

Grossa da far fiuò,

Che questa t'la può

Pr ades lassar a chà,

Osù, camina e fa

Che tutt viegnin via,

Con l'forch e i sua rastia,

Da pser vultar la paia.

Galiaz

Mo sentì Lion ch'abbaia,

Chi dien esser fuorsa lor,

Perché a sent un gran rmor,

Eni diss? Si chi ien.

Alla fè, chi han fat ben

A livarm sta fadiga

Ch s'ha vlì pur cha val diga

Am truvava avluppà

A chiamar tanta brigà.

Barba Pol

Oh a son ben ti è un galavron,

Os va' all'olla zermison,

Ch' t'ni è bon s'n' da pacchiar,

E da star a sdurmiazzar,

Ti, e quel lov d'Piron,

Chal ie vurev un bon zanghion

A scussart a ti, e lu

Al gabban, ch tut du

N'havì brisa d'zervel,

Vai un po' avr al rastel,

Ve Tunin a quij fiua,

E ti va', gverna i bua,

E tuotm un po' d'qui.

Barba Zech cun i altr cumpagn dis

Barba Pol, av do al bon dì.

Barba Pol

Ben vgnu, sta cumpagnia.

Barba Zech

A sem qui tut' alla via,

Con l'forch apparchià.

Barba Pol

Sia' pur tut ben' arrivà,

Oh, vgnì via ch'a sem di fet,

Sti pultrun iern' anch a let.

Es n'vlevin livars su,

Osù, pur n'sten zà più,

Chminzen un po' a purtar

Fuora i cuov, ch'al m'par

Che sta tibia andarà ben,

Prché a veg un bel sren,

Cha n'faren suppì altrament,

Para via Tunin valent,

Ah, Sandrina valurosa,

Ch'at vlen po far la sposa,

E ti, Flippa, e ti Anzlina,

Purtav ben in sta mattina,

Ch'av vlen po dar marì.

Sandrina

A la fè a n'in vuoi za mi,

Ch'an vuoi ma lassar mi mar.

Flippa

Oh, vgnes un ch tal vles dar

Pr vder st' l'agaffaris.

Sandrina

Sì ti fuorsa al bcaris,

Mo mi mai n'in vuoi nsun.

Flippa

A so mi di ragazzun

Ch t'andarevn pr al fasol

Masmament Tuniol

T'm'intiend ben po ti.

Sandrina

Osù pur finenla qui,

E attinden a lavurar,

Ch'al n'è temp d'chiachiarar,

Né attendr a l'zanz.

Barba Pol

Ah, gaiard inanz, inanz,

Su Ptruonj, su Piron,

Sabadin, ti è un gran pultron,

T'n' pua livar un cuov.

Sabadin

Mo l'è gros quest cha mov,

Es pesa' a dramon,

Sintì quest, barba Ton,

E lival su, sa psì.

Barba Ton

A la fè, chi en ben granì,

Es ni è ne luoi né vezza.

Pluonia

Al m'casca zo una trezza,

Asptà, ch'am l'arcuoia.

Barba Pol

Cridà un poch a qula Truoia,

Ch la va attorn l'spigh,

Dai un poch barba Bigh,

Cun quel mang dal badil,

Iachma, parla in tal purzil,

Cun quij eltr purzlin,

Va' qui, truoia, und'è Zanin?

Ch'al t'viegna un poch aidar.

Dai ch la cor in tal pular,

Osù, serra mo l'ussol.

O fiuua iè più furment

Da purtar, oh a si valent,

A l'havì za mo' finì

D'mettr in ara, osù vgnì,

Cha farem mo qulation,

Cha psama star in ton,

Cun l'è hora de vultar

Intrà sotta Cavallar,

E tuccà su l'caval,

S'a vlì po manzar al gall.

Cavallar

Andà pur tutt a pambrar

Ch'av psà po dmnar,

Cha iho rot mi la paia

Che la tibia vaga gaia.

Barba Pol

Osù, fiuua, vgnì via tut,

E fadi luog a quel put,

Sdì qui, barba Silvestr,

Osù, don, purtà al mnestr,

Cha chminzan un poch a sbattr,

Cha pren miei po attendr a battr.

Dì a la Ghida, ch porta al pan,

Battstin crida a quel can

Ch'al n'pia quel puvret.

Battstin

Te Lion, chiamal Bdet,

Dai un po' una bastunà,

Tira qui, sipt ammazzà.

Barba Pol

Sdì mo zo un puchtin,

Mett qui l'orz, Iachmin,

E po dam qual scudlot,

Ch'al pan è un po' durot,

E mi n'ho dient d'dria,

Es m'dol una zinzia,

Chal mtro' in tal vin a mui,

Ch'an poss s'ben a vui

Ma biassar ben i bcun

Sa ni mett a un a un,

A masrar in la scudella,

N' s'è fatt d'padella?

Ghida

Msier sì.

Barba Pol

Mo porta qui

Quel chi è, potta d'mi,

T'sta lì t'par incantà,

Mo d'gratia fiuua arrivà:

Fat inienz, Tuniol,

Manza ben, l' mi fiol,

Dam un poch in za al butrig,

Av fo brids, barba Big.

Barba Big

A l'azzet, av fo rason

At fo brinds, Battston.

Battston

Bon pro ve fazza, e mi al vuoi far

Qui alla Pluonia, sal ie par,

Cha ial fazza,

Pluonia

Fad pur su,

Ch'ancha mi, cun dis qulu,

Al farò a un de qustor,

Brinds donca, Salvador.

Salvador

Dam da bever, Galiaz,

Osu, Rosa, mi vel faz.

Rosa

Fadal pur lì alla Flippa,

Che mi n'so dund am sippa,

Prché quest è un asn vin.

Salvador

Val' anacqua, Iachmin,

Prch' a sent cha iho cald,

Cs n'so sa tegnarò sald,

Cha n'faga qualch chias.

Barba Zech

Va', camina quatr pas,

Ch lat purev un po' passar.

Volta in là, st'vua bussar

T'n'me dies la scazzà,

T'ha vlu tgnir sbevazzà,

Es n'ha manzà quattr bcun.

Salvador

Mo a v'ho tut pr cavrun,

Sa vlì dir cha sia imbriag.

Battston

Osù, tirat su le brag,

Che l't'van a campanella,

Ch'al ni è qui ngun ch' t'usella,

Ch'at sen tut quent amigh,

E la colpa è del butrigh,

S'ngun pur l'ha d'haver.

Barba Pol

Battston ha dit al ver,

Vat posà un puchtin,

In s'la tiezza, e stai insin

Che l'è hora de vultar,

Ti t'poss po travaiar,

Con la forca ancora ti.

Barba Zech

Mo l'è miei t'fag qusì,

In t'ugn mod al Cavallar

Ha climenz poc fa a parar

Su a la tibia le caval.

Salvador

Osù, a vag, barba Anibal

Vgnim dgratia po a dsdar,

Barba Anibal

Va' pur via, e n'dubitar,

Po l'ha pres la Simia prest,

Mo al farà la su dal rest,

E fra un poch a n'harà mal,

Mo quest'è un cattiv sgnal,

Cha iho pora con st'vin

Cha n' fagan di babbuin:

E s'a fen, cm'haven chminzà,

A srem tutt' avluppà,

E Dia sa com l'andarà.

Mett un po al butrig in là,

Ch'anca mi n'm'cunfes

Perché a sent infin' adess

Ch'a iho un poch cald al zuccon.

Barba Pol

Osù, tus, alon alon,

Su al forch, i mia fiua,

A vultar un po' i paiua,

E astav cun rason,

Una putta e un ragazzon,

Sabadin cun la Zanina,

Salvestron cun la Masina,

Tuniol cun la Tadia,

Tmasin cun la Dratia,

Mingarel cun l'Anzlina,

Battstin cun la Sandrina,

Niclò cun la Muretta,

Paulin cun la Sabetta,

Stevanel cun la Nannina,

Andriol cun la Russina,

Gasparin cun la Niclosa,

E Burtlin cun la Rosa,

E ti, Flippa, vien qusì qui,

Cha starem da ti e mi,

Osù, via d'man in man,

Cun i vostr ordegn in man,

Saltem tutt alla sbaraia,

E a rcuoier su la paia,

Cumparisca Cavallar,

E' anch hora de vultar?

Cavallar

Chminza pur, arcuioer su,

Va la rossa, tru, tru, tru,

A chi dighia mi, Pumada?

Qula ruana s'è imbalzada,

Para via, va' là, murella,

At darò ve campanella,

Va la baia, via Fruntina,

Via Liarda, via Bianchina,

Via Muscada, via Brunetta,

Su, Cuntina, su Muretta,

Ah Galanta, ah Favurida,

Su, ch' la paia è homa' finida

D'artaiar la prima man,

A la fe', ch'a i srà dal gran.

Osu, pr ades az fermarem

St'altra mnada a finirem.

Pia qui st'cavall, o là,

Ferma Bisa, sta, sta, sta,

Cha turren quattr bcun

In st'mez sti ragazzun

I daran d'sott' in su.

Barba Pol

Andà via, n'stad più

E buvì alliegrament,

Cha darem mo nu al furment:

Osù via, 'l mie mamlel,

Spinzì ben d'bon budel.

Sandrina

Battstin, lassam star,

E n'm'star a pzigar,

Ch'al n's'finirà la festa

Ch'at rumprò la testa,

Con sta forca, e s'al farò

Cha tal dig o requia mo.

Battstin

Osù, tas, e n'far rmor,

T'sa ben, ch'at port amor,

E ch'a pres a vlert ben

In tal pra' sgand al fen.

Sandrina

A dig t'viv e t'las vivr,

Ch'at darò st' non la livr.

Battstin

Osù, matta, dì più pian,

Ch'an l'ho fat a bella man.

Sandrina

An t'so dir tant parol,

Al vuoi dir a barba Pol.

Battstin

Ch cos hat, dì, ruvidazza,

Cridla mo' sta rustgazza,

Pr haverl' un po' tuccà

Cha n'm'in son po nianch adà.

Barba Pol

Battstin, n'far al zegn,

Cun l'don di cumpegn,

Masmament cun tal' e qual

T'n't' tir ados un pal.

Battstin

L'è qustia ch crida qui,

Es n'so zà prché mi.

Barba Pol

Osù via, cha 'l n'è nient,

Lavurem aliegrament,

Dai ben lì l'mia fiol,

E buttà su quel paiol,

Niclosa, volta lì,

Iachma, aidai ancha ti.

Iachma

Mo i m'tran ados d'la paia.

Barba Pol

Osù, fiua, finì sta baia.

Franceschon

Porta un poch in zà al buccal,

Cha m'bagna un po' al canal.

Barba Pol

Finem prima de vultar,

Ch'andarem tutt' a disnar,

Es bevrem po comdament

Dai ben via, su ben valent.

Franceschon

No, no, dam pur al buttaz,

Vamel, porta, Galiaz,

O ch'al turò mi, dund'el?

Perché a iho una sed ch'a sfel.

Bdet

Bev poch, Franceschon,

T'n'vag in balurdon.

Franceschon

Lassam bever quant' a vuoi,

Cha in burev' ades un suoi.

Bdet

Da mo qui, n'bever più,

Sì, sì, leva pur in su,

Ch vuot zugar, imbriagon,

T'farà qualch maron?

Franceschon

S'am imbriarò, mia dan,

N't' piar ti tant' afan,

Ch m'a sent ch'al vin m'agriezza,

Ancha mi corr a la tiezza.

Barba Pol

Osù, zà, c'havem vultà,

Mamlel, andav pusà

Sott al portegh, ch'al m'par

Ch'al sia hora d'dsnar.

Cavallar, haviv manzà?

Cavallar

Msier sì, e s'ho livà

Quattr bot in su al fiascon,

Ch'av prumet ch'a son in ton.

Barba Pol

Osù, donca, a psì andar

A finir d'tibiar,

E sgranar l'spigh ben,

Ch'ancha nu po turnaren

Com'haven bvu in t'un trat

Es farem quel ch va fat:

Oh, vgnì a tavla, ragazzun,

Su ben put, su ben garzun,

Sedì zo, e n'fad bai,

Taia un poch qual furmai,

Ch lìè d'quel c'haven in l'olla.

Burtlin

Mi vurè d'la civolla,

Tram quella vè, Piron,

Mo n'tor al zermion,

Tient ancora le scarsui,

Che mi n'vuoi i tuo rsui.

Piron

O a so mi, ch t'va in si lez.

Barba Pol

Osù, tua d'st'furmez.

Burtlin

O l'è bon, potta de mi,

Damn' un po' una fetta qui.

Barba Pol

L'è d'quel, sat Zampier,

Che fiè la vacca d'mia muier.

Zampier

A la fè, sì ch'l'è bon.

Tunin

Mo t'tai sì gruos taccon.

Zampier

Mo l'è stà st'curtlaz,

Es n'ho psù rtgnir al braz.

Tunin

Sì, a so ben ch ti è balord.

Barba Pol

O Piron, ti è trop ingord,

Manda in zà quel lasagn,

T'm'par un mal cumpagn,

T'n'ha manzà squas un cadin,

Senza darn a tua vsin,

T'vua ch'al t'tira po la panza,

Tuo' sta po di carn ranza.

Piron

A n'vuoi carn ranza, mi,

Ch la m'sta in gola tutt' al dì,

Dla torta a in turò ben.

Barba Pol

Vetla a punt qui, ch la ven,

Ch l'è qui la zea Nicola

Ch la porta in s'la rola.

Tunin

Zea Nicola, vgnì ben via.

Barba Pol

O tusuot, tgnì in là i rastìa,

Ch'al z'la bisogna cumpartir

Ch'al ni sia po da rugnir.

St è al pzol dal cavallar,

Vaial, porta, e nal manzar,

Asptà, quent senia tut?

Tunin

Vintidu, senza st'put.

Barba Pol

E st' put s'grattaran,

Che sta botta l' n' n'haran.

Zea Nicola

A ijn darò ben po' mi,

Dan pur vu a quisti qui.

Barba Pol

Osù, asptà, le mie fiol,

Ch'av darò al vostr pzol,

Es l'è poch, n'cridà,

Prch' a sen troppa brigà,

Tua al buttaz, vè Piron,

E tra d'quel lì dal canton.

Tunin

Al vien via, es par ch'al buffa,

Oibò, ch' l'ha la muffa.

Barba Pol

Mo de qual hat cavà?

Piron

D'quel vassel, c'haven cumprà.

Barba Pol

Al malan ch' Dia t'dia,

Osù, tornal pur in dria,

Van tra' ti, Galiez,

Che qustù è un balurdez

Che n'val un bagaron,

Mi n'vist ma' più al straminchion.

Al fiè qusì l'altra matina,

A dig: “Portam la guaina”,

Al me porta un falzinel,

Guardà vu se l'ha zervel.

Osù, bvema tut un trat,

E po' andema a far di fat,

Osù, alt i mia tusot,

Salvador, iet anch cot?

Salvador

A vagh anch un poch intorn,

Mo a son stà lì, dop al forn,

A slargarm un puchtin,

Es ho fat quattr ninin,

Tal cham sent mo in zervel

Es farev un saltarel,

S'al ie fus un sunador.

Tunin

Osù, inienz, Salvador,

Ch'a vlen far al paiar.

Salvador

Andem pur po' far mi par,

Ecchm qui tut garbà.

Tunin

Chminzem qui da st'là,

Ti Ptruoni, e ti, Mingon,

E ti, Bdet, e Batiston,

A farì al paiar, e nu

V'trarem la paia su,

Su, tusuot, inanz, inanz,

Spinzì su, n'fad zanz,

Dam paia, su brigà,

Buttà su qula furcà,

Vgnì via con qual bel mont.

Iachmin

Al m'è sta accolt in la front,

L'è sta una de st' tos,

Mo a vuoi essr so mros.

Barba Pol

Osù, via, n'chiacchiarar,

Ch'l'è orma' fat al paiar,

Fai ben su la bella punta,

Tuo' sta paia, e dai zunta,

Fal pulid, car fradia,

Ch'al par pendr un poch indrija.

Bdet

Al farem ben tutt'ugual,

Faz pur dar un po al buccal.

Barba Pol

Dai qui l'orz, Iachmin,

Osù via, da paladin,

Cha finema sta facenda,

Ch'andarem po' tut a mrenda.

Osù, siva al paiar è fat,

Arcuien mo ditt' e fat,

Su la massa dal furment,

Spazza ben qui, ti Nuzent,

Dai lì dria con la granà,

Vien qui ti, cun quel qutà.

A chi dighia? Vè ch'alloch,

Para ben su lì quel loch,

Ch'al n'vaga a mal al gran,

Ch'in dsiv, barba Galvan?

V'avrissi ma' pinsà

Ch'al sin fuss arcolt mà

Una massa qusì fatta?

Barba Galvan

Mi cred ben cun la srà tratta,

E ch la srà ben svintlà,

Cha iharì dal gran assa'

Lassà pur frapar chi frapa,

Ch'al darà cinq pr cappa,

Over quatr e mez almanch,

Es è bell, gross e bianch,

Al i è un poch de ghiutton,

Mo al vien mo' da la stason

E po quel ni fa nient,

Ch'in tal pan an si sent.

Basta, l'è una bella massa,

Es zugarò ch' la passa

Del corb dusent e più,

Sal i è nsun ch metta su

E i viegna la murìa,

A ch vol la carastia,

Ch'al iè al mond ciert avarez,

Si n'havesn i palez,

I granar e i magazzin,

N'pinsà chi sien ma' pin,

Al ie resta lì i quattrin

E al furment in si granar,

Ch d'là i nal pon purtar,

E in tal far di testamient,

I la lassan a certa zent

Ch n'suffrissin, al vuoi pur dir,

Ch'is portn a suplir,

Chi chmenzin a triunfar

A sguazzar, a squaquarar,

E quel misr, quel avaron,

N'manzò mai un buon bcon,

Pr tgnir l'arzent stret,

Es n'haveva al puvret

Mai attornun buon gaban,

L'è ben ver che nu villan

Tren al graffi vuluntiera,

Es andem spes a Rubiera,

E alla fiera de rampin,

Mo s'havem un bulgnin

Al spindem alliegrament,

Es n'fen cun fa sta zent,

Ch n's'impin mai al gos.

Barba Pol

Os lassem andar st'cos

Zà ch'haven fat al paiar,

E ch la massa è mo da trar,

A turen quattr bcun

D'insalà cun di zdrun,

Dal furmai e dal per,

Ch'altr qui n'psen haver,

Ch'in vrà più s'n'agurarà.

Barba Zecch

Pol a vlen andar a chà,

Fa un to cont ch'appan mrindà,

Ch' l'è poch ch'haven manzà.

Barba Pol

Osù, n'fen sti bagatel,

Sdì zo, le mij mamlel

E tulì du bucunzia,

E arrivà lì a quij piattia,

La n'par unta, st'insalà.

Ghida

L'è ch la n'iera ben sguzà,

Mo asptà, cha ijn metrò.

Barba Pol

T'al but via, hos basta mo',

La sta pur miei un puchet,

T'n'arriv qui Bdet.

Bdet

A iho sed, mi barba Pol,

Iachmin, damn un miol,

Ch'am voi po amular a cà.

Francescon

O Bdet, und s'va?

Ch n' z'asptav anca nu.

O mamlel, livà mo su,

Ch l'è hora d'marchiar.

Barba Pol

Lassail anch un poch star,

Potta d'mi, ti è sì frzos

N'v'partì, le mie tos,

S'a vulì far un ballet,

Cha farem vgnir Marchet,

A sunar al so stuffel,

Es farì un saltarel.

Barba Zech

Pol, al bsogna andar a chà,

Che 'l bstiol aspettan là

Cha'l si vaga a far d'la fuoia,

St'mamlel haren ben vuoia

D'scussar un po' al grimbal,

Mo l'è tard, quest' è al mal,

Es patirè el vacch,

E po' agnon è mez stracch,

Al faren po' un'altra botta.

Barba Pol

O, bvì almen un'altra botta.

Bdet

A dig ch'al bsogna andar,

Su, chminzav un po amular:

Menga, mena via st'put.

Barba Pol

Osù, fiua av ringrazi tut,

E sa si sta mal trattà,

A sta tibia, cm' a turnà

A quest'altra, ch'a farem

Fuorsa miei v'trattarem.

IL FINE