VANTO

DI DUI VILLANI

CIOE'

SANDRON E BURTLIN

sopra l'astutie tenute da essi nel vender le castellate

quest'anno

COSA BELLA DA RIDERE

SANDRON E BURTLIN

Sandron

Ah an, vè, vè, Burtlin, che questa botta

A ti l'havèm cargà a sti babiun,

Vè c'haven uslà sti galavrun,

Chi z'astiman manch d'una recotta.

Burtlin

Sì, e sì l'haven cargà Sandron, mo potta

Dal mond, iz tgnean per curnachiun,

E ades i chenin trars in zenuchiun

Si volin d'la nostr'uva, e stars sotta.

Sandron

Dì al ver, Burtlin, hat più Castellà?

Burtlin

Con sa n'ho, sì cha n'ho, mo an vuoi dir,

Cha vuoi, fradel, ch' l'am sippa ben pagà.

Sandron

A n'ho ancha mi, mo a in vuoi zinquant' lir,

E la porta a ch' la vol.

Burtlin

Oh, t'gli harà

Dal cert. Tienla pur su, t'n'pua fallir.

Sandron

Oh, s'la s'pses tgnir

Achmod s'fa al furment in sal granar,

Oh t' puà dir cha m'la farè pagar!

Burtlin

Mo mi, i vurè vder sgangar

D'la sed, e straslar, e cascar mort,

Tant è l'odij, Sandron fradel, cha i port.

Sandron

No, no, tegnema pur fort

E sald al pè in s'l'astla, nu villan,

Ades cha vden c'haven la balla in man.

Burtlin

Mo possa pur da i can

Esser manzà, se mi i vuoi correr dria,

A la vuoi ben inienz dar a i purzia.

Sandron

Mo crit mi cha sia

Un barbazagn cascà zo d'un nuson?

N'sat sa i ho al diavol in tal zuccon.

T'sa ben cha son giutton,

Ch'l'è un pez t'm'acgnos, e sa cha suoi

Farn di quelli ch'puzzan, quand a vuoi.

Burtlin

An vuoi za t'm'tuoi

Al priessi a mi per cont d'agaffar,

Cha nassì al mond sol per sgraffignar,

Sandron

Ma a ni pren durar

Fradel, chi cazzan tat i pat in su,

Ch' s'a n'rubasn mal biad nu.

Burtlin

No, no, cun dis qulù

S'lor vuoln i puorch, i cappun e i quattrin,

E nu anden a la fiera d'rampin.

Sandron

Lassa pur far, Burtlin,

Al patron qual chal fa, e quel chal po,

Chin tugn mod al pagaren dal so.

Burtlin

Cha n'robba, mo s'al so,

Fradel, st'm'ligas l' man de dria,

A m'inzignarè d'torla con i pia.

Sandron

Mo crit mi cha sia

Un'ocha? N'sat quand al dorm al patron

Sa so cuoier al maiuol e l'albanon?

Burtlin

Mo dì pur ti, Sandron,

La canva e al lin, chal rest srè una fola,

Ch'ugn ragazzetta vol la so mazzola.

E ma n'fermen la gola

O cha manzen d'l'mel, e d'l'per,

E dluvien tut quel cha psen haver.

E s'a t'ho a dir al ver,

A so, fradel mia car, cha fag ogn'art

Per ni dar mai al terz d'la so part.

Sandron

Mo i diest' pur al quart,

Mo slament la fava cha mangien

Quand l'è in ti camp, e al zes cha venden,

E quand a vendmen,

I più bia grap n'tremia da un là

Oh, guarda che d'quij i n'happia ma',

Oltra cha tgnen bcà

La più zalla, e l'aserba a la mten

In tal bgonz, e quella cha schen

E i ruoz ch'atachen

Al tassel, e l'sorbl, e l'nus

Ch'arpiatta in tl'a cassa i nuostr tus

Ch'in fichn in tut i bus,

Mo quest è nient, fradel, ch'haven cuntà,

Turnema un puoch a dir d'l'castellà,

Cha i n'è d'nu, cun t'sa,

Ch' quand i n'han tant uva ch'la possa impir

I fan ch'al poz dal rst hapa a suplir.

Burtlin

Mo sta n't'partir,

N'havia a negar un tos mi l'altr dì

Chiera in t'la castlà, pota d'mi.

Sandron

Mo ch'cosa fieval lì?

Burtlin

Mo l'iera vgnu pr veder vindmiar

Ch'al so patron n's' dsea fidar

Ch'mi ni al fies star

E s'iera fic li dentr al giandarot,

E si dsea haver durmì tutta la not,

E mi viegna via d'bot

Con d'l'acqua in spalla per trariela in fond,

E dment cha la tro' zo, po far al mond,

A sent es n'so dond

S'viegna una vos ch'crida “oimia, oimia”,

Es veg st'ombra ch's' leva in pia,

E mi casch zo al indria,

Per la gran pora, es tria al bigonz in fas,

E poc sin mancò ch'an m'plas,

E inienz cham asguras

A stie un pzol, e pur a mi accustà

Chal pareva pruoprij un pullaster anegà,

Tant l'havevia lavà.

Es dig: “Ch'fiev lì dentr, puvraz?”

E lu bravand respos: “A fieva un laz

Ch't'apicca, ladronaz,

T'm'ha tut bagnà la camisa, e al zibon,

Mo at promet chal vuoi dir al patron.”

“Tas, tas”, dighia, “Minchion,

Cha vlea lavar al fond, i era un po' brut,

E a trar zo l'acqua, a t'ho bagnà ti tut.

N'dar mo ti in ti rut,

Ch'an t'havea vezu t'fus lì,

Ch'an son miga una bestia niancha mi”.

Po, i fia dar un vestì,

La camisa, un capel e i mia bragun,

E la Tuonia i sugò fin a i schfun.

E perché a' sua patrun

Al n'dses nient, al fie menar

Appres al fuog, e s'al fia governar

Ben ben, po a in fia dunar

D'l'mel, d'l'nus e mil cagariol,

Po a i dis: “N'dir na gotta, al mie fiol,

Sben a i ho in t'lussol

Trat qula poca d'acqua, chat prumet

Chan t'vleva bagnar ti, puvret.”

E con st'barzelet

Al fie taser, es n'fu nient,

E poi turnie a trar d'l'acqua novament,

Chan pseva altrament

Impirla, chal n'iera grasp assa',

S'la poz n'm'haves un poch aidà.

Sandron

Mo t'm'ha ben mo' acchiappà,

Cosa crit ch'hapa fat ancora mi?

Oh fradel, a iho fat piez d'ti,

Cha i mniè una l'altr dì

A un caldiran, al qual m'die i quattrin,

In s'la man, es n'vos miga sesin,

Ma tut bie zchin,

A la barba d'quij ch'gli han vindù

Manch d'nu, e ch'n'ihan anch apu,

E, a dirla fra nu du,

A ti cazzie d'l'acqua d'maniera

Chal n'in met za lu tant in la caldiera.

E ades mo sl s'dspiera,

Chal dis chal tinaz n'ha ma livà.

Burtlin

Mo a tal cred, fradel, sti ha lavà

L'grasp cun t'm'ha cuntà,

Achmod volal chal lieva, al puvraz,

E lu in die haver trat d'l'altra in tal tinaz.

Tant ch'l'harà un bel sulaz

Ch'ma l'la farà svinar a i rastlin,

Ch'la sarà più d'acqua che d'vin.

A tal ch' sti cittadin

Han bel dal gof, a dirla qui fra nu,

Si credin cha siama turlulu,

Ch' si havessin ben più

Occh ch'n'ha al pavon in t'la cova,

I n'haran ma' da nu la part sova.

M'viegna al mal d'la lova

Ch apos dir al ver, es t'al zur,

Cha iho fat star mill bot anch i fattur,

Prché la not al bur,

D'ment ch' lor durmivan am son livà

Es son andà in l'ara, es ho insaccà

Al gran, es l'ho purtà

In sal granar, e qusì d'man in man

Cun t'sa cha saven far nu altr villan.

Ch'andem a Rastgnan

Tut l'an, e in Graffagnana vuluntera,

Po' a turnem pr la piana zo a Rubiera,

Mo una stmana intiera

A i sre da dir; basta, ch' nu cuntadin

Nassem tut con l'man fat a rampin.

Sandron

Eh, n'dir qusì, Burtlin,

Cha i n'è anch d'quij ch'dan so dver,

Burtlin

Al po esr Sandron, t'digh ver,

Mo mi n'so vder,

Es a i n'è pur qualch'un, ch' mi n'al so,

Al ni è di nuostr, es al sustintarò.

Cha so mi quel cha fo,

E ti, e Mengh e in somma, i cuntadin,

Tut van con l'man vluntiera a rastlin.

Sandron

T'ha tort, Burtlin,

Ch' pr dies ch'sien trist infra d'nu,

A i n'è mill ch'ijn da ben, ancora più.

Es so ch' mi padr fu

Un hom da ben, e mi, ch'm'appicas,

An prev ma' durmir un dì cha n' rubas.

Es pr sort al passas

Qual dì chan dies un qualch sgrafgnot

An prev ma' durmir tutta qula not.

Am tro' al crud e al cot,

E a quel cha poss'haver, fradel mie car,

Mo destrament pr ni far cridar.

Horsù, at vuoi lassar

Archmandam a tut quant qui fiuua

E sforzat esr da bel al più ch't'pua.

IL FINE